دارين السكري
كلو ماشي بالبخشيش...
بدايةً، قامت وزارة التربية بأول يوم امتحان بتاريخ 1 حزيران «بكف أيدي عدد من المدرسين، وأحالت عدداً من رؤساء المراكز الامتحانية للرقابة الداخلية في محافظتين سوريتين لمشاركتهم في عمليات الغش في الامتحانات العامة».
واليوم، الأحد بتاريخ 6 حزيران أصدرت وزارة التربية عدة قرارات «لكف أيدي عدد من المدرسين في محافظتين سوريتين (غير محافظات اليوم الأول) بعد أسبوع على بدء امتحان شهادة الثانوية العامة».
طبعاً مع تأكيد الوزارة على استمرار التعامل بحزم مع كل من يسيء إلى العملية الامتحانية بما يحقق الاستقرار ويساهم في إعطاء الأحقية للمجتهد والمتابع...
وما مننسى كل الإجراءات يلي عملتها وزارة التربية من إجراءات لوقف الغش إن كان عن طريق الكاميرات أو إحالة المدرسين يلي ساهموا وساعدوا بالغش واتخاذ الإجراءات المناسبة بحقون...
ومشكورين لأنون عم يحاولوا يوقفوا الفساد بقطاع التعليم... ولو كان شكلي ومو عام ولا عميق.. بس بعكس مؤسسات الحكومية التانية يلي الفساد ناخرها نخر من شروشها... وما بدها تعترف..
نقلاً عن لسان الطلاب
المهم يا سادة يا كرام....
ونقلاً ع لسان الطلاب الأعزاء بعدة محافظات...
حبو يخبرونا ويورجونا أنو في مدرسين ما همون قرار التربية بـ «الإعفاء» وضلوا عم يمارسوا الغش والبخشيش...
طالب تاسع من محافظة حلب قال: «في طالب معنا بالقاعة بيكون قرايب الموجه وكل شوي يجي الأستاذ وينقلو وحتى الآنسة المراقبة ضلت تنق فوق راسي لنقلو المسألة ووقت قلتلها بس لكمل حل... سحبت الورقة مني وقالتلي ما بخليك تكتب لتنقلو...»
طالب تاني بنفس القاعة علقتو نفس الآنسة المراقبة لينقل طالب تاني «قلها كمان هاد قرايبو للموجه؟؟ قالتلو لا بس هاد دافع... دفاع متلو لخليك تتنقل...»
طالبة بكالوريا في محافظة دمشق قالت: «الكاميرات مو شغالين محطوطين منظر بس... والمراقبين ينقلو يلي قلبون لهفلون للطلاب وينبهوا علينا نتنقل ع الساكت منشان إذا إجا حدا من مراقبين الوزارة... والله كلما تنكشنا المراقبة إنو في حدا نحط عيونا بورقتنا...»
وطالب بكالوريا في محافظة حمص قال: «في طالب شكلو شاري المركز كلو.. ما بعرف ابن مين هو، طلب يفوت ع الحمام ونزل معو المراقب، طلع الطالب ومعو ورقة إجابة.. طبعاً نسحبت ورقتو وضل حاطط الورقة يلي بقدرة القادر طلعت معو...»
طالبة بأحد فروع كلية تشرين عم يسألوها: كيف عم تقدم أختها... فكان جوابها كتير لذيذ «صحيح أختي مالا دارسة بس ضامنة النجاح لأنو دفعنالها...»
دفعتولها؟؟ لمين دفعتو؟؟ ولشو دفعتو؟؟؟
طلعت موضة إنو بيشتروا المراقبين أو رؤساء المركز (والله أعلم).
ما بدنا نحط حدا بزمتنا.... بس هيك عم يقولوا الطلاب... واللي بيأكد هل الشي إنو الوزارة عم تعمل إحالات ع التفتيش من ورا عمليات الغش..
يعني يا حبايب قلبي ويلي حوليه...
العمل الجدّي
هلأ يمكن كوزارة في مين عم يشتغل من قلب ورب غير الباقيين... من وضع كاميرات المراقبة لتشفير الأسئلة.. لغيرها من المتابعات.. مع التحفظ ع بعض الحلول، متل: قطع خطوط الإنترنت والاتصال...
إلا إنو لهلأ ما طلعت حلول حقيقية بوش الغش والفساد والرشوات يلي صارت...
ويمكن باختصار العمل الحقيقي يلي لازم ينعمل عنجد لوقف كل هل الفساد هاد هو التغيير الحقيقي للسياسات التعليمية كلها من المناهج للرواتب مروراً بالعملية الامتحانية نفسها... وإلا ح يبقى الحال على ما هو عليه..
والله مو صعبة.. إذا النية موجودة!
معلومات إضافية
- العدد رقم:
- 1021
